Дүйшөмбүгө караган түнү орус армиясы Украинаны 100дөн ашуун дрон жана төрт С-300/400 ракетасы менен аткылаганын Украинанын Куралдуу күчтөрү билдирди.
Харьковдун Словодской районунда балдар бакчасы менен соода жайы бузулганын Украинанын чукул кырдаалдар кызматы билдирди. Шаар мэри Игорь Терехов орусиялык аскерлер эл жашаган конушту жана жарандык жайды бутага алды деп айыптады. Шевченко районунда көп кабат үйгө дрон тийгенде өрт чыкты. Жабыр тарткандардын саны 27ге чыкты, алардын үчөө балдар.
Одессада гараждар турган жай, машине оңдоочу жердеги кеңсе жана бир нече вагон талкаланды. Жеңил, жүк ташуучу машинелер жана автобус иштен чыкты. Одесса облусунун аскердик администрация башчысы Олег Кипер жаңы конуштун жанындагы күзөт турган жерге сокку тийгенде бир киши набыт болгонун билдирди.
Просяная айылында жеке үйлөрдүн бирине дрон тийгенде өрт чыгып, үч киши жабыр тартты.
Киевдин мэри Виталий Кличко баш калаанын Деснянский районунда дрон сыныктары административдик имараттын дубалын, газ куурун бузуп, токтоп турган машинеге тийгенде жарылуу болгонун билдирди.
Соломенский районунда атып түшүрүлгөн дрондун сыныгы машине жуучу жерге, Голоссевский районунда кеңсеге тийгени, андан эч ким жабыр тартпаганы кабарланды.
Орусиянын негизги үч аэропортунда – Москвадагы Шереметьево, Санкт-Петербургдагы Пулково жана Нижный Новгороддогу Чкалов аба майданында 6-июлда кечке жуук 400дөй рейс кармалып турду. Бул тууралуу Орусиянын Транспорт министрлиги кабарлады.
Мекеме мындай чектөө украиналык дрон чабуулу маалында жана катаал аба ырайы шартында учуулардын коопсуздугун камсыздоо үчүн киргизилгенин түшүндүрдү.
Шереметьеводо 171 каттам токтотулуп, 56сы эки сааттай кечигип учкан. Пулководо 90 каттам токтотулуп, 37си кармалган. Нижный Новгороддо 26 каттам токтотулса, 13ү кечигип учкан. Транспорт министрлиги билдиргендей, Чкалов аэропортундагы учактар мындан да көбүрөөк чектөөгө кабылган.
Мекеме кырдаал көзөмөлдө жана авиакомпанияларда кыйын кырдаалда иштөөгө мүмкүнчүлүгү жетиштүү экенин кошумчалаган.
Петербург менен Москванын ортосунда темир жол билеттеринин тартыштыгы байкалган.
“Коммерсантъ” басылмасына эксперттер 5-6-июлдагы мындай кырдаал авиакомпанияларды 20 миллиард рублдик чыгымга учуратканын айтышкан.
Орусиянын Коргоо министрлиги жекшембинин кечинде 48 украиналык дронду абадан коргонуу системасы жок кылганын билдирди. Алардын ону Подмосковьеге жана экөө Ленинград облусуна атылган.
6-июлга караган түнү Украинага 157 орусиялык дрондор менен сокку урулуп, алардын 117си атып түшүрүлгөнүн Киевдин Аба күчтөрү билдирди.
“Душмандын дрондору 19 аймакты бутага алганы катталды, ошондой эле атып түшүрүлгөн дрондор эки жерге түштү”, - деп айтылат билдирүүдө.
Харьковдо дрон чабуулунан эки киши – 46 жаштагы аял жана бир бала жабыркаган.
“2 жаш 8 айлык кыз катуу стресске кабылган. Ага зарыл медициналык жардам берилип жатат”, - деди облустун башчысы Олег Синегубов.
Киев облусунда үч киши жараат алганы маалым болду.
“Дрондун сыныктары 35 жаштагы кишинин далына, колу жана бутуна тийген. 79дагы аял жана 75 жаштагы киши катуу стресске кабылды”, - деп жазды облустун башчысы Николай Калашник.
Анын айтымында, эки көп кабаттуу үй зыян тартып, төрт гараж жана бир унаа күйүп кеткен, үч машина жабыркаган.
Түнкү дрон чабуулдары Запорожье шаарына жана районунда да катталган. Облустук администрациянын башчысы Иван Федоровдун билдиришинче, соккунун кесепетинен жеке ишкананын имараты, кампа жана айыл чарба техникалар зыян тарткан. Юрковка айылында 89 жаштагы аял жараат алып. үйү жабыркаган.
Украинанын өзгөчө кырдаалдар кызматы орусиялык күчтөр Харьковдо жана Херсондо мурда сокку урулган жерде иштеп жаткан украиналык куткаруучуларды бута алганын билдирди. Мында өрт өчүрүүчү цистерналар зыян тартып, куткаруучуларга эч нерсе болгон эмес.
4-июлга оогон түнү Орусиянын Украинага жапырт чабуулу учурунда Польшанын Киевдеги консулдугу да зыян тартты.
«Кечээ Орусиянын жапырт соккусунун кесепети оор болду, өрттөр тутанып, чоң зыян келтирилди. Анын ичинде Киевдеги поляк консулдугу да бар», — деп жазды Х түйүнүнө Польшанын тышкы иштер министри Радослав Сикорский.
«Президент Трамп, Путин сиздин тынчтыкка келүү аракетиңизге шакаба чегип отурат. Украинага зениттик куралдарды берүүнү калыбына келтирип, баскынчыга каршы катаал санкцияларды киргизиңиз», —деп Сикорский АКШ президентине кайрылды.
Орус армиясы түндө Украинага массалык чабуул коюп, 550дөн ашуун ракета жана дрон менен аткылады. 539 учкучсуз учактын 330у Shahed дрондору, бирөө Х-47М2 "Кинжал" аэробаллистикалык ракета, алтоо баллистикалык "Искандер-М/KN-23" жана "Искандер-К" канаттуу ракетасы экенин Украинанын Куралдуу күчтөрү билдирди.
Украин президенти Владимир Зеленский негизинен бутага Киев алынганын айтты.